Бишкек мэринин транспорт, курулуш жана архитектура маселелери боюнча орун басары Жамалбек Ырсалиев борбордогу автобекеттин көчүрүлүшү Бишкек шаарынын аймагынын кеңейиши жана калктын санынын өсүшүнө байланыштуу экенин түшүндүрдү. Ошондой эле жарандардын шаар ичиндеги кыймылын ыңгайлаштыруу, тыгындарды азайтуу максатында автобекетти көчүрүү идеясы келип чыкканын айтты.
Автобекетти көчүрүү маселеси буга чейин эле көтөрүлүп, тиешелүү тараптарга эскертилип келген.
“Ал жерди эч ким менчиктеп ала албайт. Курулуш куруп алат, же көп кабаттуу үйлөр салынат деп айтылган сөздөр чындыкка жатпайт. Андай маалымат чыгарууга да эч кандай негиз жок. Бул жерлер мамлекеттин өзүнүн карамагында гана болот. Алдын ала эскертүүлөр болуп, жайкы сезон учурунда иштеп алалы, 31-августка чейин кое тургула деген сунуштарынбиз макул болуп аягына чейин күттүк. Эми өз убактысы келгенде автобекет көчүрүлдү”,- деди Ырсалиев.
