Кыргызстанда Аламан улак федерациясы түзүлгөнүн Улуттук коопсуздук мамлекеттик комитетинен билдиришти.
Акыркы мезгилде улуттук аламан улак оюнун өткөрүүдө бирдиктүү регламенттин жана эрежелердин жоктугунан спорттук командалардын ортосунда ар түрдүү чыр-чатактар чыгып, кээ бир учурларда оор жаракаттан улам адам өлүмүнө алып келген учурлар катталууда.
Ушуга байланыштуу министрлер кабинетинин төрагасынын орун басары — УКМК төрагасы Камчыбек Ташиевдин тапшырмасына ылайык – оюнду уюштурууну жана өткөрүүнү иретке келтирүү боюнча жумушчу топ түзүлгөн.
Мында катышуучулардын жана көрүүчүлөрдүн коопсуздук деңгээлин жогорулатууга, системалуу тартип бузууларга жол бербөөгө, мелдештерди уюштурууда калыстык менен ачык-айкындуулукту камсыздоого багытталган жаңы жоболор жана регламенттер бекитилди.
Улуттук спорттун бул түрүн жайылтууну жана буга байланыштуу иш-чараларды координациялоо максатында Аламан улак федерациясы коомдук уюму расмий каттоодон өтүп, Исмаилов Чолпонбай Адишович федерациянын президенти болуп шайланды.
