Чүй облусунун Ысык-Ата районунун Нурмамбет айыл аймагындагы Красная Речка айылында 80 жумуш ордун түзгөн жаңы тигүү цехи ишке берилет. Бул тууралуу ишкана жетекчиси Бурул Исаева “Кабар” маалымат агенттигине билдирди.
Быйыл ишке берилүүчү 128 ишкананын катарында «Инсан Текстиль” ЖЧКсы негиздеген тигүү цехи учурда тесттик режимде иштеп жатат. Жакынкы күндөрү август айынын аягында расмий түрдө ишке берилет.
Тигүү цехине болжол менен 55 млн сом жумшалып анын 45 пайызы насыя жолу менен салынды. Биздин фабрика 80 кишини иш менен камсыз кылууга ылайыкталган. Учурда жергиликтүү тургундардан 15тен ашык кыз-келиндер иштейт. Бирок, цех тесттик режимде иштеп, насыяны төлөө зарылчылыгы жаралгандыктан чет өлкөдөн жумушчуларды алганга муктаж болуп жатабыз”, — дейт жеке ишкер.
Аталган тигүү цехи айына 10-12 миң даана даяр кийим чыгаруу кубаттуулугуна ээ болуп, эркектердин жана аялдардын кийимдери экспортко тигилет. Товарлар жүз пайыз Россия, Казакстандан буйрутма аркылуу онлайн сатылат. Тигүү цехинин расмий ачылышы 29-августка белгиленген.
