Президент Садыр Жапаров
Түркиянын Вице-президенти Жевдет Йылмазды кабыл алды. Бул тууралуу президенттик аппаратуранын басма сөз кызматы билдирди.

Маалыматка ылайык, тараптар эки жактуу кызматташуунун кеңири чөйрөсүн талкуулашып, өзгөчө көңүлдү саламаттык сактоо тармагындагы кызматташууга, банк секторун өнүктүрүүгө жана инвестициялык өнөктөштүктү тереңдетүүгө бурушту.

Мамлекет башчысы дүйнөлүк экономиканын туруксуздугу шартында тараптар биргелешкен аракеттер менен өз ара товар жүгүртүүнү 5 млрд АКШ долларына жеткирүүгө ниеттенип жатканын белгиледи. Бул багытта өкмөттөр аралык комиссиянын иши жана экспорттук-импорттук алымдарды төмөндөтүү чаралары өзгөчө мааниге ээ.

Мындан тышкары, Кыргызстан түрк ишкерлерине энергетика, транспорт, логистика, айыл чарба, туризм жана башка тармактарда инвестиция салуу үчүн жагымдуу шарттарды сунуштоого даяр.

Өз кезегинде Түркиянын Вице-президенти Жевдет Йылмаз Президент Режеп Тайып Эрдогандын атынан салам жолдоп, эки өлкөнүн лидерлеринин саясий эркинин аркасында Түркия менен Кыргызстандын кызматташуусу ар тараптуу стратегиялык өнөктөштүк деңгээлине жеткенин белгиледи.

Жевдет Йылмаз Кыргызстандын өнүгүүсүнө токтолуп, өлкөнүн экономикалык өсүш динамикасын, жүргүзүлүп жаткан реформаларды жогору баалап, инфраструктура жана курулуш тармагындагы оң өзгөрүүлөрдү белгиледи.

Жолугушуунун аягында тараптар көп тараптуу стратегиялык өнөктөштүктү мындан ары өнүктүрүүгө, өз ара пайдалуу кызматташууну тереңдетүүгө жана Кыргызстан менен Түркиянын ортосундагы достук байланыштарын чыңдоого берилгендиктерин тастыкташты.