Кыргызстандык Нурзат Нуртаева Бириккен күрөш дүйнөсүнүн (UWW) дүйнөлүк рейтингинде үчүнчү орунга чыкты. Бул тууралуу United World Wrestling сайтында жарыяланды.
Жаңыланган рейтинг 13-21-сентябрда Хорватияда өткөн күрөш боюнча дүйнө чемпионатынын жыйынтыгы боюнча түзүлгөн.
Нурзат Нуртаева 72 килограммга чейинки салмак ченинде күч сынашып, коло медалга ээ болуп, UWWдин жогорку тепкичине чыгууга мүмкүндүк алды. Бул беттеште ал франциялык Полин Лекарпентерди 5:0 эсебинде утуп алды.
Эскерте кетсек, 76 килограммга чейинки салмак ченинде Кыргыз Республикасынын дагы бир өкүлү Айпери Медет кызы алдыңкы орунда турат.
