Министрлер кабинети эмгек шарты өзгөчө мүнөздөгү кызматкерлердин жаңы тизмесин жана алар үчүн белгиленген кыскартылган жумуш убактысын бекитти. Тиешелүү № 859 токтомго 2025-жылдын 31-декабрында кол коюлган.

Документ КР Эмгек кодексинин 51 жана 194-беренелерин, ошондой эле «КР Министрлер кабинети жөнүндө» конституциялык мыйзамынын 13 жана 17-беренелерин аткаруу максатында кабыл алынды.

Токтом менен өзгөчө мүнөздөгү жумушчулардын жаңыланган тизмеси жана алардын жумуш убактысынын ченеми бекитилди. Ага ылайык, иштин өзгөчөлүгүнө жана кесиптик тобокелдик деңгээлине жараша жумуш күнү негизинен 6 же 5 саат деп белгиленди.

Кыскартылган жумуш күнү төмөнкүлөр үчүн белгиленди:

• инфекциялык, кургак учук жана психиатриялык оорулуулар менен түздөн-түз байланышта болгон медицина кызматкерлерине;
• реабилитациялык борборлордун, физиокабинеттердин жана патологоанатомиялык кызматтардын кызматкерлерине;
• тез жардам станцияларынын, кан борборлорунун жана лабораториялардын персоналына;
• дарыканалардын, фармацевтикалык өндүрүштөрдүн жана дары-дармектердин сапатын көзөмөлдөөчү лабораториялардын кызматкерлерине;
• соттук-медициналык экспертиза кызматынын эксперттерине;
• радиоактивдүү заттар жана иондоштуруучу нурлануу булактары менен иштеген адистерге;
• социалдык мекемелердин, үй-интернаттардын жана балдардын адистештирилген мекемелеринин кызматкерлерине;
• лабораториялык-диагностикалык кызматтын жумушчуларына.

Өлүк материалдары, өзгөчө коркунучтуу инфекциялар жана радиация булактары менен иштеген айрым категориялар үчүн жумуш күнү 5 саат деп белгиленди.

Токтом төмөнкүлөрдүн күчүн жоготту деп тааныйт:

• Өкмөттүн 2008-жылдын 8-февралындагы № 39 токтомун;
• Өкмөттүн 2010-жылдын 5-мартындагы № 131 токтомун.

Жаңы токтом расмий жарыялангандан он күн өткөндөн кийин күчүнө кирет.