Нарын облусунда кышкы туризмди өнүктүрүү, аймактын туристтик мүмкүнчүлүктөрүн кеңейтүү максатында “Бозо” фестивалы өтүүдө. Бул тууралуу облустагы өкүлчүлүктөн билдиришти.
Маалыматка ылайык, иш-чарада улуттук суусундук болгон бозонун даярдоо ыкмалары жана түрлөрү кеңири чагылдырылууда.
Ошондой эле “Нарын бренди” аталган жергиликтүү азык-түлүктөрдүн көргөзмөсү уюштурулуп, кол өнөрчүлөрдүн эмгектери келген конокторго тааныштырылып жатат.
Мында кыргыз элинин улуттук баалуулуктарын даңазалаган улак тартыш, салбуурун, жаа атуу сыяктуу улуттук оюндар көрсөтүлүп, иш-чара концерттик программа менен коштолууда.
Белгилей кетсек, аталган фестиваль 13-февралдан 16-февралга чейин уланып, Нарын облусуна ички жана чет өлкөлүк туристтерди тартууну көздөйт.
