Нарын облусунун Ат-Башы районунда өзгөчө ири өлчөмдөгү алдамчылыкка шектелип 36 жаштагы жаран кармалды. Бул тууралуу Нарын облустук милициясы билдирди.
Милициянын маалыматына ылайык, ал январь–апрель айлары аралыгында бир нече жаранга тайларын, торпокторун жана койлорун Ысык-Көл облусуна бактырып берүүнү же бордоп семиртип сатып берүүнү убада кылып, алардын малдарын алып кеткен. Бирок, шектүү малдарды Токмок шаарындагы мал базарда башка адамдарга сатып, акчаларды өз кызыкчылыгына жумшалган. Жабырлануучуларга келтирилген жалпы материалдык зыян 4 миллион 115 миң сомду түзгөн.
Аталган фактылар боюнча Кылмыш-жаза кодексинин 209-беренеси (Алдамчылык) менен өз-өзүнчө кылмыш иштери козголду. Учурда тергөо иштери уланууда.
