Мурдагы премьер-министр Мухаммедкалый Абылгазиев ден соолугуна байланыштуу ооруканага түштү. Аныгыраагы УКМКнын убактылуу кармоочу жайынан, бир нече күн алдын Бишкек шаарында жеке «Бикард» клиникасына которулган. Бул тууралуу укук коргоо органдары кабарлайт.
Эске салсак, 2021-жылдын 21-майында Бишкек шаарынын Биринчи Май райондук соту Абылгазиевге карата камакка алуу түрүндөгү баш коргоо чарасын 2021-жылдын 26-июлуна чейин УКМКнын СИЗОсуна камоо менен узарткан.
Белгилей кетсек, мурунку премьер-министр Абылгазиев мыйзамсыз баюу боюнча айыпталууда. УКМКнын маалыматы боюнча, Абылгазиев премьер-министр кезинде буйрукка кол койгон, ага ылайык, Кумтөр Голд Компани геологиялык чалгындоо жана алтын казып алуу үчүн кошумча аймактар менен камсыз болгон. Кендин жалпы аянты эки эседен ашык көбөйүп, 26,3 миң гектарды түздү, анын ичинде бир нече мөңгүлөр жана корголуучу аймак.
