Кыргызстандын Росссиядагы элчилиги Шереметьево аэропортунда кармалып тургандарга байланыштуу орус Тышкы иштер министрлигине нота жиберди. Бул тууралуу элчилик кабарлады.
Маалыматка ылайык, кече 22-октябрда Москванын Шереметьево аэропортунда бир топ Кыргызстандын жарандары текшерүүгө алынган. ФСБ аты-жөнүн өзгөрткөн кишилерди аныкташ үчүн аэропортто текшерүү өткөрүп жатканын билдирген. Алар Кыргызстандан учуп баргандар, же кайтып келаткандар экени да белгисиз.
Элчилик азырынча канча адам аэропортто экени жөнүндө маалымат берген жок.
Эске салсак, 7-октябрда да аталган аба майданында Кыргызстандан барган жүздөгөн жаран тыкыр текшерүүдөн өтүп, кыйла убакыт кармалып турушкан.
