Бишкекте айдоочулардын жетишсиздигинен улам Өзбекстандан алынып келген 210 автобустун 110 гана иштеп жатат. Бул тууралуу бүгүн, 20-декабрда Бюджет жана финансы боюнча комитетинин жыйынында вице-мэр Таалайбек Орозов билдирди.
Анын айтымында, жеке фирмалар тарабынан алынган 210 автобустун калган 100 автобусу колдонулбай эле турат.
«2019-жылга чейин 4000 ашуун маршрутка каттаса, бүгүн күндө 1500 гана иштеп жатат. Муниципалдык ишканадан 70 автобус, 130 троллейбус каттамга чыгып жатат», – деди Орозов.
Ошондой эле ал мэрия Кытайда өндүрүлгөн автобустарды Казакстандан алуу боюнча сүйлөшүүлөрдү жүргүзүп жатканын кошумчалап, учурда макулдашуу этабында экендигин баса белгиледи.
