Аламүдүн районунда уурулукка шектүү жаран кармалды. Бул тууралуу Чүй облустук милициясынын басма сөз кызматы билдирет.
Билдирүүгө ылайык, ушул жылдын март айынын башында Аламүдүн РИИБине 1968-жылы туулган К.Б. аттуу жаран арыз менен кайрылган. Анда белгисиз бирөөлөр контейнеринин эшигин бузуп кирип, кийим тигүүчү машиналарын уурдап кетишкенин билдирген. Келтирилген материалдык чыгым 900 миң сомдон ашкан.
Бул факты Кылмыштардын бирдиктүү реестрине Кылмыш-жаза кодексинин 205-беренеси (Уурдоо) боюнча катталган.
Жүргүзүлгөн ыкчам иш-чаралардын натыйжасында жогорудагы кылмышка шектелип 1992-жылы туулган Б.Т. аттуу жаран кармалып, убактылуу кармоочу жайга камакка алынган.
Териштирүү учурунда шектүү буга чейин бир нече жолу соттолгону аныкталып, башка кылмыштарга тиешеси бар же жок экендиги боюнча териштирүү иштери жүргүзүлүүдө.
Учурда сотко чейинки өндүрүш иштери улантылууда.
