Окуучу кыздардын алтындарын алдоо жолу менен чечип алууга шектүү жаран кармалды. Бул тууралуу Жазаларды аткаруу кызматынан билдиришти.
Маалыматка караганда, окуя 11-мартта борбор калаанын Кара-Жыгач конушунда болгон. Жаза аткаруу кызматынын оперативдүү-режимдик башкы башкармалыгынын кызматкерлери 30 жаштагы жаранды кармашкан.
«Бул жаран Чүй облусунун Панфилов, Москва жана Жайыл райондорунун аймагындагы орто мектептеринин жашы жете элек окуучулардын алтын, сөйкө, шакек, чынжырларын жана башка буюмдарын алдоо жолу менен тартып алганы үчүн издөөдө жүргөн. 2022-жылдын башынан бери жаш кыздардын баалуу буюмдарын тартып алуу максатында ал жакка барып турганы аныкталган. Маалыматка ылайык, 10го жакын мындай учур катталган. Буга чейин ага мындай кылмыштар үчүн бир нече жолу иш козголуп, соттолгон.
Азыр аталган райондордун ички иштер органдары тарабынан бул фактыларга тиешеси бар адамдарды, ошондой эле анын мыйзамсыз аракеттеринен жабыркагандарды аныктоо боюнча ыкчам-иликтөө иш-чаралары жүргүзүлүүдө»,- деп айтылат маалыматта.
