Жалал-Абад шаарында жолдун ортосунан жаш кыз эс-учун жоготкон абалда табылды. Бул тууралуу Жалал-Абад ОИИБден билдиришти.
11-март күнү саат 03:10 чамасында Жалал-Абад ШИИБдин «102» кызматына телефон чалуу болуп, анда Жалал-Абад шаарынын Ленин көчөсүндө жайгашкан телеканалдын жанында, темир жолдон 50 метр аралыкта, жолдун ортосунда азият улутундагы 20-25 жаштагы кыз акыл-эсин жоготуп, өзүн билбей жаткандыгын кабарлаган.
Ал Жалал-Абад шаарындагы оорукананын жандандыруу бөлүмүнө жаткырылган жана жанында эч кандай документ болгон эмес. Окуя болгон жерге Жалал-Абад ШИИБдин тергөө-ыкчам тобу чыгып, окуя болгон жерге кароо жүргүзүлүп, соттук-медициналык экспертиза дайындалып, жакын жерлерде жайгашкан видеокамералар каралып, окуяга тиешеси бар видеотасмалар алынган. Тергөө иштери жүрүп жатат.
