Өткөн жылдын апрель-май айларында кыргыз-тажик чек арасында болгон окуяда тажик аскерлеринин огунан курман болгон Мамасалы Каратаевдин үй-бүлөсүнө президент Садыр Жапаровдун атынан унаа берилди. Бул тууралуу 7-каналга президенттин Баткен облусундагы өкүлчүлүгүнөн билдиришти.
Өлкө башчынын атынан берилген унааны президенттин Баткен облусундагы ыйгарым укуктуу өкүлү Абдикарим Алимбаев тапшырды. «Облус башчысы маркумдун үй-бүлөсүнө көңүл айтып, ар дайым мамлекет тарабынан тиешелүү жардамдар мындан ары да берилип, көзөмөлдө болоорун айтты. Белгилей кетсек чек ара окуясында курман болгон Каратаевдин унаасы талкаланган. Маркумдун уулу буга чейин атасынын унаасын калыбына келтирип, айдагысы келгендиги боюнча кайрылуу жасаган. Өлкө башчы маркумдун уулунун кайрылуусун угуп, анын үй-бүлөсүнө унаа тапшырды. Президент Садыр Жапаровго Каратаевдин үй-бүлөсү өздөрүнүн ыраазычылыктарын билдиришти. Каратаевдин үй-бүлөсү учурда чек ара окуясында каза болгон жарандар үчүн курулган Мадина шаарчасында жашашат. Маркумдун артында жубайы жана 6 баласы калган»,- деп айтылат маалыматта.
