Ысык-Көлдө каннабис тобундагы баңгизаттарды мыйзамсыз колго өндүрүүчү лаборатория аныкталды. Бул тууралуу ИИМдин басма сөз кызматы билдирди.
Маалыматка ылайык, Ысык-Көл облусунун Т.А., аттуу тургунунун үйүндө тинтүү жүргүзүлүп, жыйынтыгында каннабис тобундагы баңгизаттарды өндүрүүчү лаборатория үчүн жабдылган кампадан көк түстөгү 100 литрлик желим бочканын ичинен жашыл түстөгү зат табылып алынган. Ал таңгактары менен жалпы салмагы 26 килограммды түзгөн. Болжол менен гашиш баңгизат каражаты болгон.
Ошондой эле ал жакта баңгизатты жасоочу шаймандар болгон. Терезесинен боз түстөгү желим идишке салынган салмагы 26 граммды түзгөн гашиш баңгизаты табылып, алынган. Алынган баңгизаттардын жалпы салмагы 26 килограмм 26 граммды түзөт.
Кармалган шектүү убактылуу кармоочу жайына киргизилген.
Учурда бул кылмышка тиешеси бар башка жарандарды аныктоо боюнча иликтөө иш-чаралары жүргүзүлүүдө.
