Жогорку Кеңештин Эл аралык иштер, коргоо, коопсуздук жана миграция комитети Кемпир-Абад суу сактагычын Кыргызстан менен Өзбекстандын биргелешип башкаруусу жөнүндөгү келишим долбоорун жактырды. Бул тууралуу жергиликтүү басылмаларга аталган комитеттин төрагасынын орун басары Чолпон Султанбекова билдирген.
Ал белгилегендей, келишим долбоорун жыйынга катышкан бардык депутаттар жактырышкан. Жыйын жабык өтүп, Султанбекова бул кылдат каралчу маселе экенин, туура эмес маалыматтар жайылып кетпеши үчүн аны жабык кароо чечими кабыл алынганын айткан. Бирок комитет башчысынын орун басары макулдашууну ратификациялоо ачык өтө тургандыгын белгилеген.
Процедура боюнча эки өлкөнүн президенттери документке кол коюп, аны Жогорку Кеңештин кароосуна жана ратификациялоого жөнөтөт.
Эске салсак, Өзбекстандын президенти Шавкат Мирзиёевдин Кыргызстанга иш сапары пландалып жатат, азырынча так күнү белгилене элек.
