Милиция Казакстанга 12 баш жылкыларды уурдап өткөрүүгө шектүүлөрдү кармады. Бул тууралуу Талас ОИИБден билдиришти.
Маалыматка ылайык, 2022-жылдын 6-декабрына караган түнү Кара-Буура районунун Ак-Жар айылынын эки тургунуна тиешелүү болгон 12 баш жылкы уурдалып, Кара-Буура районуна караштуу Сатыкей айылынын түндүк-чыгыш тарабындагы Кыргызстан менен Казакстанды бөлүп туруучу чек ара белгисинен Казакстан тарапка өтүп кеткендигин билдирген.
Аталган факты ушул жылдын 1-январь күнү Кара-Буура РИИБдин Кылмыштардын бирдиктүү реестрине катталып, тергөө амалдары жүргүзүлүп баштаган.
«Милиция 2023-жылдын 21-февраль күнү аталган кылмышка шектүүлөрдү колго түшүргөн. Алар Кара-Буура районунун Кара-Сай айылынын 1976-жылы туулган тургуну Э. уулу М. жана Куру-Маймак айылынын 1983-жылы туулган М.А. экендиги аныкталган. Шектүүлөргө тийиштүү тергөө амалдары жана иликтөө иштери жүрүп жатат»,- деп берилет маалыматта.
