Бишкек шаарынын мэри Эмилбек Абдыкадыров коомдук транспорттун тарифи тууралуу суроого «Кабар» маалымат агенттигиндеги өткөн маалымат жыйынында жооп берди.
Ал белгилегендей, мэрия жарандарды коомдук транспортто жол кирени накталай эмес төлөөгө үндөп жатат.
“Жүргүнчүлөр накталай төлөй турган болсо, анда автобуска 11 сом эмес, 15 сом деп сунуштап жатабыз. Себеби, биз накталай эмес төлөмгө өтүшүбүз керек. Бирок жол кирени көтөрүү боюнча токтом долбоорун кайра артка чакыртып алдык. Себеби нааразычылыктар көп болуп, эл тарифти көтөрө албашын билдиришти. Азыр тариф көтөрүлбөйт”, — деди ал.
Эскерте кетсек, Бишкекте коомдук транспорттун тарифин көтөрүү сунушталып, троллейбус менен автобустун жол киреси 15 сом, маршрутка саат 6:00 — 20:30 аралыгында 21 сом, саат 20:30 — 6:00 аралыгында 32 сомду түзмөк.
