Ошто 5 жаштагы кыздын бетине кайчы сайылып калган. Бул тууралуу Ош облустук балдар клиникалык ооруканасынан билдиришти.
Маалыматка ылайык, ооруканага 9-март күнү Кара-Суу районунун тургундары А.К. аттуу кызын алып келишкен жана ал дароо кулак-тамак мурун бөлүмүнө жаткырылып, операция жасалган.
“Кичинекей кыз үйүндө столдун үстүнөн жыгылып түшкөн учурда колунда кайчы болгон. Кайчы оң жак жүзүнө 6-7 см сайылып калган. Мурдунун оң жак тешигин тешип өтүп, көз асты аркылуу баш сөөктүн негизинде жайгашкан көңдөйчөнүн сөөгүнө сайылып токтогон. Баланын бактысына ошол жерде жайгашкан чоң артерияларга тийген эмес, андай учурда баланын өмүрүнө кескин түрдө залал келмек. Азыркы учурда бейтаптын абалы жакшы, ооруканадан үйгө чыгууга даярдык көрүлүүдө. Мындай татаал операцияны кулак-тамак мурун бөлүмүнүн бөлүм башчысы Умутбек Дурусбекович жасаган”- деп берилет маалыматта.
