Социалдык тармактарда белгисиз жарандарды сабап жаткан видео боюнча баңги топтун мүчөлөрү кармалды. Бул тууралуу ИИМден билдиришти.
26-мартта күрөөчүлөр делген жарандарды белгисиз адамдар сабап жаткан видео жарыяланып, коомчулукта чоң резонанс жараткан.
Козголгон кылмыш ишинин алкагында өздөрүн милиция кызматкери катары тааныштырып, күрөөчүлөрдү ээн жерлерге алып барып, сабап, “Принцесса Дури” аталышындагы интернет-дүкөнүнөн уурдалган баңгизаты үчүн кечирим суроого мажбурлашкан.
Бул көрүнүштү шектүүлөр камерага тартып, кураторлоруна жөнөтүшкөн. 3-апрель күнү 2001-жылы туулган А.у.Г., 2000-жылы туулган К.Т. жана 2004-жылы туулган К. А. кармалып, буюм далилдери алынган.
Бул факты боюнча Кылмыш-жаза кодексинин 261-беренеси менен кылмыш иши козголгон, анда мүлкүн алып коюу менен 10 жылдан 12 жылга чейинки мөөнөткө эркинен ажыратуу каралган.
