Чет элдик жарандарды каракчылык менен тоноп жүргөн кылмыштуу топ кармалды. Бул тууралуу Бишкек ШИИББинин басма сөз кызматы билдирди.
Маалыматка ылайык, 24-декабрь күнү Свердлов РИИБине Пакистан өлкөсүнүн И.Х. аттуу жараны арыз менен кайрылган. Анда ошол эле күнү болжол менен саат 04:30 чамасында Киев жана Шопоков көчөлөрүнүн кесилишинде белгисиз жарандар арыз ээсин бычак менен коркутуп, 300 доллар жана 4 миң сом өлчөмүндө акча каражатын, Хуавэй үлгүсүндөгү уюлдук телефонун тартып алышкан.
Ошондой эле 26-декабрда Биринчи Май РИИБине Пакистандын Ш.М. аттуу жараны арыз менен кайрылган. Анда 25-декабрь күнү саат 22:00 чамасында болжол менен 17-19 жаштагы кебетеси азиялык болгон балдар Жибек Жолу көчөсүнөн бычак такап 6 миң сомун, ошондой эле анын Х.Б. аттуу таанышынын 5 миң сомун тартып алып, из жашырып кетишкен.
Мындан сырткары 26-декабрь күнү Биринчи Май РИИБине дагы Пакистандын Р.Ш. аттуу жараны арыз менен кайрылган. Анда 21-декабрда Асанов жана Жибек Жолу көчөлөрүнүн кесилишинен болжол менен 16-20 жаштагы балдар бычак менен коркутуп, 15 миң сомдук Самсунг үлгүсүндөгү телефонун, 5 миң сомун тартып алып, из жашырып кетишкен.
«Жогорудагы бул фактынын баары Кылмыштардын жана жоруктардын бирдиктүү реестрине 202-берене «каракчылык» менен катталып, сотко чейинки өндүрүшкө алынган. Издөө иш-чараларынын жүрүшүндө милиция кызматкерлери тарабынан кылмышка шектүү 15 жаштагы Б.Н., 16 жаштагы Б.Х., 20 жаштагы Т.А. аттуу балдар кармалып, экөө үй камагына алынса, бирөө СИЗО-1ге 2 айга камакка алынды. Учурда тергөө иштери уланууда», — деп берилет маалыматта.
