Чүй районунун аймактык ооруканасынын жугуштуу оорулар бөлүмү 1998-жылдан бери иштебей турат, имаратка капиталдык ремонт талап кылынат, анын наркы болжол менен 13 млн сомду түзөт. Бул тууралуу өкмөттүн басма сөз кызматы билдирди.
Маалыматка ылайык, аймактык ооруканада жүк ташуучу лифт дагы иштебей калган, бул бейтаптарга жана медиктерге оорчулукту келтирүүдө.
Ошондой эле, вице-премьер-министр Эльвира Суабалдиева Ысык-Ата районунун Ивановка айылындагы Республикалык балдар психиатриялык ооруканасына барды.
Учурда мекемеде, аянты 1 миң кв.м. саналган имаратта 8 бала бар, аларды камсыздоого республикалык бюджеттен жылына 8 млн сом бөлүнөт.
Сапардын жыйынтыгы боюнча вице-премьер-министр мекемелерди тийиштүү жабдуулар менен камсыздоо боюнча маселени иштеп чыгууну тапшырды.
Тийиштүү мамлекеттик органдарга бейтаптардын дарылануусу жана жашоосу үчүн тийиштүү талаптарды эске алуу менен балдар психиатриялык ооруканасын Бишкек шаарына которуу маселесин иликтеп чыгуу тапшырылды.
