УКМКнын төрагасы Камчыбек Ташиев Никита Александрович Гончаровго КР идентификациялык (ID) картасын жана жалпы жарандык паспортун тапшырды. Бул тууралуу УКМКдан билдиришти.
12-июлда “Facebook” социалдык тармагында жаран Никита Гончаровдун УКМК төрагасынын атына КР улуттук паспортун алууга көмөк көрсөтүү өтүнүчү менен кайрылуусу жарыяланган.
Үй-бүлөлүк оор шарттарга ылайык, Гончаровдун жети жашында апасы ооруп каза болуп калган. Кийинки жылдары атасынын колунда чоңоюп, зарыл болгон алгачкы документтеринин жоктугунан Кыргызстандын жаранынын паспортун ала алган эмес. Ал 3 жыл бою конституциялык укуктарын ишке ашыруу үчүн ар кайсы ведомстволорго кайрылып жүргөн.
Улуттук коопсуздук органдары тарабынан өздүгүн аныктоо жана архивдик материалдарды чогултуу боюнча бир катар иш-чаралар жүргүзүлдү. Бүгүн, 26-июлда Ташиев оор турмуштук кырдаалга туш болгон жарандардын көйгөйлөрүн чечүү боюнча жүргүзүлүп жаткан жигердүү иштердин алкагында Никита Гончаровго КРнын идентификациялык (ID) картасын жана жалпы жарандык паспортун тапшырды.
