Кыргыз жарандары үчүн Орусиянын Усурийск шаарындагы Приморский мамлекеттик айыл чарба академиясына бюджеттик негизде 20 орун берилди. Бул тууралуу Кыргыз өлкөсүнүн Орусиядагы элчилиги билдирди.
Маалыматка ылайык, 2021-2022-окуу жылына карата төмөнкү багыттар боюнча күндүзгү окуу үчүн 20 бюджеттик орун бөлүнгөн:
- Агроинженерия;
- Агрономия;
- Агрохимия жана агроөсүмдүктөр;
- Ветеринардык-санитардык экспертиза;
- Зоотехния;
- Токой чарбасы;
- Өндүрүш технологиясы жана айыл чарба продукциясын иштетүү.
Чет өлкөлүк уюмда билим алгандыгы жөнүндө күбөлүк алган абитуриенттер экзамендеринин жыйынтыгы боюнча Академияга кире алышат. Документтер академиянын http://primacad.ru/ сайты аркылуу «Абитуриент» бөлүгүндө дистанциондук түрдө электрондук түр менен тапшырышат.
- Документтерди кабыл алуу — 20.07.2021-жылга чейин.
- Киришүү сынактары — 29.07.2021-жылга чейин.
- Катталуу — 17.08.2021-жылга чейин.
- Окуунун башталышы — 2021-жылдын 1-сентябры.
Белгилей кетсек, бардык чет өлкөлүк студенттер жатакана менен камсыз болушат. Мындан сырткары биринчи курстун студенттерине ай сайын стипендия төлөнүп берилет.
