Азиянын бешинчи ирет чемпиону болгон Айсулуу Тыныбекова жеңишинен кийин билдирүү калтырды.
«Биздин капчыкта дагы бир алтын медаль! Кубанып, сыймыктанып турам! Мен үчүн жеңишти көздөй бет алуу узак жана татаал жол болду… Жылдын өзү дагы көп сыноолор менен коштолду. Мени колдоп, мага ишенгендердин баарына терең ыраазычылык билдирем! Бул жеңиш меники эле эмес, жалпыбыздын жеңишибиз! Сиздерге чоң рахмат!»- деген балбан кыз.
Белгилей кетсек, Айсулуу Тыныбекова 62 кг ченде монголиялык Орхон Пуревдоржду 9:5 эсебинде жеңип, алтын медаль тагынды. 2018-жылы Айсулуу Тыныбекова дал ушул спортчуга Азия оюндарынын финалында утулуп калган.
Учурда кыз-келиндер Кыргызстан курамасында үч медаль бар. Айсулуу Тыныбекова алтын, Айпери Медет кызы күмүш, Калмира Билимбекова коло медалдын ээси болду.
