Ак-Суу районундагы дыйкандарга 40 тонна арпа жана 20 тонна буудай үрөнү берилди. Бул тууралуу Cуу ресурстары, айыл чарба министрлиги билдирет.
Маалыматка ылайык, Ысык-Көл облусунун Ак-Суу району боюнча дыйкандарга жеңилдетилген шартта 20 миң литр күйүүчү май бөлүнүп берилди. Мындан тышкары, кошумча 32 миң литр күйүүчү май алуу үчүн дыйкандар тарабынан каражаттар банкка топтолду.
Ага кошумча мамлекеттик колдоонун алкагында, дыйкандарга 40 миң килограмм арпа жана 20 миң 400 килограмм буудай үрөнү берилди.
«Көрүлүп жаткан чаралар жазгы талаа иштерин өз убагында жана сапаттуу жүргүзүүгө шарт түзөт. Учурда жергиликтүү бийлик жана тиешелүү мекемелер дыйкандарды колдоо иштерин улантып, талаа кампаниясынын уюшкандыкта өтүшүн камсыздоодо», — делет маалыматта.
