Ала-Букадагы Көк-Таш айылынын бир тургунун 10-апрелде Өзбекстандын чек арачылары алып кирип кетти. Бул тууралуу бүгүн президенттин Жалал-Абад облусундагы өкүлү Абсаттар Сыргабаев Ала-Бука районунун эли менен жолугушуп жатканда Көк-Таш айылдык кенештин депутаты Хафиза Байназарова айтып чыкты.
«Көк-Таштык Мунарбек кечээ мал жаюуга жайытка чыккан учурда өзбек чек арачылары аны алып кетишиптир. Бирок, кыргыз чек арачылардын аралашуусу менен Өзбекстанда кармалып турган жаранды бүгүн түштөн кийин алып келишээри айтылып жатат»- дейт Байназарова.
Ал эми Ала-Бука районундагы 2030 аскер бөлүгүнүн командири Руслан Мамырканов эки тараптын чек арачылары сүйлөшүүлөрдү жүргүзүп, кыргыз жаранын өлкөгө кайтаруу иш-аракеттери жүрүп жатканын айтты. Алдын ала айтылган маалыматтар боюнча ал жаран мал издеп жүрүп, Өзбекстан тарапка тагыраагы алардын заставасы жакка өтүп кеткен.
