Чүй облусунда 275 орундуу жаңы мектеп курулду. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, Аламүдүн районундагы Бер-Булак айылында наркы 192 миллион сомду түзгөн О.Турусматов атындагы эки кабаттуу мектептин курулуш иштери жыйынтыкталды. Долбоор республикалык бюджеттин эсебинен каржыланды.
Жаңы мектеп 275 орунга ылайыкталып, заманбап талаптарга жооп берген, окуу корпусу спорт залы менен курулуп, окуучулар жана мугалимдер үчүн бардык ыңгайлуу шарттар каралган.
Белгилей кетсек, учурда курулуш иштери толук аяктап, жакынкы күндөрү пайдаланууга берилет.
