Аскер прокуратурасы УКМК менен бирге Ош жана Манас шаарларынын аскер комиссариаттарынын кызматкерлерин камакка алды. Алар пара алуу жана опузалоо боюнча айыпталууда.
Маалыматка ылайык, 13-ноябрда Аскер прокуратурасы тарабынан УКМКнын кызматкерлеринин ыкчам коштоосунда Ош жана Манас шаардык аскер комиссариаттарынын үч кызматкери камакка алынды. Алар Кылмыш-жаза кодексинин «Пара алуу» жана «Опузалап пара алуу» беренелери боюнча козголгон кылмыш иштеринин алкагында кармалды.
Учурда аскер прокуратура органдары тарабынан кылмышка тиешеси бар кызмат адамдарын аныктоо максатында тиешелүү тергөө амалдары жүргүзүлүүдө.
