Баткенде абактагы атасын чыгарууга убада берип, 1,5 млн сом алдап алган жаран кармалды. Бул тууралуу облустук милициядан билдиришти.
Маалыматка ылайык, 2025-жылдын 2-октябрында шаардык милицияга Баткен районунун 28 жаштагы тургуну кайрылып, Баткен шаарынын 46 жаштагы тургуну Э.С. анын ишенимине кирип, «абактагы атаңды бошотуп берем» деп убада берип, 1,5 млн сом акчасын алдап алып, ушул күнгө чейин түрдүү шылтоолор менен качып жүргөнүн билдирген.
Бул факт боюнча кылмыш иши Кылмыш жаза Кодексинин 209-беренеси (Алдамчылык) менен катталып, шектүү Э.С. кармалып, 2 айга убактылуу кармоочу жайга киргизилди.
Учурда тергөө иштери уланууда.
