Автоунааларды мыйзамсыз каттоо схемасы аныкталып, шектүүлөр кармалды. Бул тууралуу ИИМден билдиришти.
Маалыматка ылайык, шектүүлөр Кыргызстанга Honda үлгүсүндөгү унаанын тектитерин алып келип, курап автоунаа жасашкан. Унаалар жасалма документер менен каттоого алынган. Шектүүлөр бул аракети менен белгиленген бажы төлөмдөрүн төлөөдөн качышкан жана мыйзамсыз пайда алышкан. Алдын ала маалыматтар боюнча, мамлекетке 15 млн 677 миң 910 сом зыян келтирилген.
Кылмышка шектелип кармалган жети адамдын арасында «Унаа» ишканасынын кызматкерлери дагы бар экени кошумчаланды. Учурда бул кылмыш иши боюнча тергөө иштери улантылып, аталган кылмышка катышы бар башка адамдарды тактоо иштери жүргүзүлүп жатат.
