Бүгүн аялды эки баласы менен өлтүрүүгө шектелген Чынтемир Аширалиевдин соту өтүп, соттук-медициналык экспертизанын жыйынтыгы айтылды.
Экспертиза Бишкектеги батиринде балдары менен өлтүрүлгөн Алтынай Канзаманованын өлүмүнүн себебин аныктады.
Аял көкүрөк тушуна учтуу темир сайылып, алган жараатынан көп кан жоготуп каза болгон. Канынан алкоголь, спирт табылган жок. Соттолуучу буга чейин окуя болгон күнү аял мас болгонун айткан. Ал эми, 17 жаштагы кызы катуу жаракат алган, боору жарылып кеткен. Анын да көкүрөк тушуна бычак болушу мүмкүн делген учтуу темир сайылган. Канынан алкоголь табылган эмес. Ал эми, 8 жаштагы уулу муунтулган.
Эскерте кетсек, үрөй учурган окуя 16-февраль күнү 5-кичи райондогу батирлердин биринде болгон. Анда аял эки баласы менен киши колдуу болгон. Бул кылмышка шектелип УКМКнын мурдагы кызматкери 37 жаштагы Чынтемир Аширалиев кармалган.
