Баткенде 28 млн сомдук малды чек арадан мыйзамсыз алып өтүүгө аракет кылган жаран кармалды. Бул тууралуу облустук милициядан билдиришти.
Маалыматка ылайык, 2025-жылдын 1-ноябрында Баткен районунун Кара-Бак айылынын аймагында Баткен ОИИБдин Бангизаттарды мыйзамсыз жүгүртүүгө каршы күрөшүү кызматынын кызматкерлери “Вольво” үлгүсүндөгү жүк ташуучу автоунааны токтотушкан. Текшерүү учурунда унаада 35 баш бодо мал бар экени жана аларды чек арадан мыйзамсыз өткөрүүгө аракет көрүлүп жаткандыгы аныкталган.
Тергөө учурунда Бишкек шаарынын 36 жаштагы тургуну М.К. кошуна мамлекеттин жараны менен алдын ала сүйлөшүп, малды мыйзамсыз өткөрүү боюнча план түзгөнү, ал үчүн айдоочуларды жалдаганы белгилүү болду. Бул малдарды Лейлек району аркылуу алып өтүү аракеттери милициянын ыкчам аракети менен токтотулду. Малдын жалпы баасы 28 млн сомду түзгөн.
Жаран убактылуу кармоо жайына киргизилди.
