Мыйзамсыз баңгизат сатуу менен алектенген чет элдик жаран Кыргызстандан кармалды. Бул тууралуу ИИМдин Басма сөз кызматы билдирди.
Маалыматка ылайык, Баткен облусунун Жаштык айылынын аймагында Тажикстан менен чектешкен башкы жолдо баңгизаттарды жеткирүүнү уюштуруп жана сатууну көздөгөн Тажикстан Республикасынын З.З. аттуу жараны кармалган. Ага тинтүү жүргүзүү учурунда скотч менен таңгакталган 9 кг салмактагы өзгөчө жыты бар “гашиш” баңгизаты табылып алынган.
Соттук-химиялык экспертизанын корутундусуна ылайык, алынган зат Ооганда өндүрүлгөн “гашиш” (чарс) баңгизаты болуп чыгып, анын жалпы салмагы 9 килограмм 521 граммды түздү.
Азыркы учурда З.З. аттуу жаран Лейлек райондук ички иштер башкармалыгынын убактылуу кармоочу жайына киргизилип, бул боюнча сотко чейинки өндүрүш уланууда. ИИМдин Баңгизаттарды мыйзамсыз жүгүртүүгө каршы күрөшүү кызматы республика боюнча ушундай фактыларды аныктоого багытталган тиешелүү иш-чараларды системалуу түрдө өткөрүп турат.
