Баткен облусунун прокуратурасы мамлекетке 38 миллион сомдон ашык материалдык зыян келтирген финансылык мыйзам бузууларды аныктады. Бул тууралуу мекеменин басма сөз кызматы билдирди.
Аудитте Баткен облустук капиталдык курулуш башкармалыгынын жооптуу кызматкерлери Баткен, Лейлек жана Кадамжай райондорундагы алты социалдык объектинин (мектеп, бала-бакча) аткарылбаган жана бүтпөгөн курулуш иштеринин тендердик шарттарын бузуу менен жеке жактарга 38,1 млн сом суммасында мыйзамсыз түрдө акча которушканы аныкталган.
Курулуш учурунда:
- Капчыгай айылындагы бала-бакчада 10,7 млн сом;
- Үч -Дөбө айылындагы бала-бакчада 3,7 млн сом;
- Үч -Дөбө айылындагы орто мектепте 8,6 млн сом;
- Баткен районунун Сай айылындагы орто мектепте 5,1 млн сомдук мыйзам бузуулар аныкталган.
Ошондой эле Кадамжай районунун Кара-Дөбө айылындагы орто мектептин капиталдык ремонту учурунда 3,6 млн сом жана Лейлек районунун Ак-Кол айылындагы орто мектептин спорт залынын курулушу 6,1 млн сомдук мыйзам бузуу аныкталган.
Чогултулган материалдар Кылмыш-жаза кодексинин 320-беренеси (кызмат абалынан кыянаттык менен пайдалануу) боюнча катталып, сотко чейинки өндүрүш башталды.
