Баткендин Кадамжай районунда жол кырсыгынан бир киши каза таап, эки адам жаракат алды. Бул тууралуу ӨКМдин басма сөз кызматы билдирди.
Маалыматка ылайык, окуя бүгүн Ош — Баткен — Исфана унаа жолунун 158-чакырымында болгон. Билдирүү алгач Тез жардам кызматына түшкөн.
«ВМW үлгүсүндөгү жеңил унаанын дөңгөлөгү жарылып жолдон чыгып кеткен. Анын ичинде төрт эркек киши отуруп бараткан. Бир адам ошол жерден каза тапты, ал Өзбекстандын 43 жаштагы тургуну экени белгилүү болду», — деп айтылат маалыматта.
Белгилей кетсек, жабыркаган эки киши Кадамжай аймактык ооруканасынын жандандыруу бөлүмүнө жаткырылган. Куткаруучулар каза болгон жарандын сөөгүн ИИМ кызматкерлерине өткөрүп беришкен.