«Балага сүйүнчү» жөлөк пулун алууга арыз берүүчү мобилдик сервис ишке кирген биринчи күнү 1 029 арыз кабыл алынды. Бул тууралуу Эмгек, социалдык камсыздоо жана миграция министрлигинен билдиришти.
Маалыматка ылайык, арыздардын 584ү же 56,8%ы «Түндүк» тиркемеси аркылуу берилген. Ал эми калган 445 арыз же 43,2%ы Калкты тейлөө борборлору жана жарандык абалдын актыларын каттоо органдары аркылуу кабыл алынган.
Министрликтен белгилешкендей, жаңы сервис ата-энелерге мекемелерге барбастан, жөлөк пул алуу үчүн электрондук түрдө арыз берүүгө шарт түзөт. Ошол эле учурда документтерди тиешелүү мекемелер аркылуу тариздөө мүмкүнчүлүгү да сакталган.
