Бишкек–Ош унаа жолунун кар көчкү жана таш кулоо коркунучу жогору болгон 400-чакырымында узундугу 742 метрди түзгөн эки тилкелүү тоннель курулат. Бул тууралуу Транспорт жана коммуникациялар министрлиги билдирди.
Маалыматка ылайык, долбоордун алкагында жолдун 409-чакырымында таш кулоодон коргоочу курулмалар, ал эми 451-чакырымында жер көчкүгө каршы тирөөч дубалдар курулуп жатат.
Ошондой эле тоннелдин Бишкек тараптагы кире беришиндеги тоо бооруна коргоочу торлорду орнотуу иштери 90 пайызга аяктады.
Мындан сырткары, курулушка керектүү бетон заводу толугу менен бүткөрүлүп, инженер-консультанттар үчүн кеңсе жана лабораториянын курулушу аяктоо алдында турат. Тоннелди курууга зарыл болгон атайын материалдар Япониядан этап-этабы менен жеткирилип, учурда алардын жети партиясы Кыргызстанга алып келинген.
Бул ири инфраструктуралык долбоор Транспорт жана коммуникациялар министрлиги менен Япониянын эл аралык кызматташтык агенттиги (JICA) тарабынан биргелешип ишке ашырылууда.
Тоннелди толук пайдаланууга берүү 2028-жылга пландалган.
