Бишкекте коомдук-муниципалдык транспорттор электрондук төлөмгө өткөн үч күндүн ичинде 80 миңден ашык “Тулпар” картасы сатылды. Бул тууралуу мэриядан билдиришти.
Маалыматка ылайык, үчүнчү күнү 91 миң жол кире накталай эмес жол менен төлөнгөн.
Эске салсак, Бишкекте 20-августтан тарта коомдук-муниципалдык транспорттордо накталай акча кабыл алынбай жатат. Мындан ары жүргүнчүлөр жол кирени электрондук жол менен — “Тулпар”, “Visa”, “Элкарт” жана башка карталар, Mbank, Megapay, Balance, O!Деньги мобилдик тиркемелери менен QR код аркылуу гана төлөй алат.
Мындан тышкары, Тулпар карталарына суроо-талаптын жогорулашына байланыштуу стандарттуу көк карталарды жеткирүү иштери улантылууда.
