Бишкекте чет элдик жаран кармалып, граната жана октор алынды. Бул тууралуу ИИМден билдирди.
Маалыматка караганда, «А» аттуу жаранда граната жана ок-дарылар бар экендиги, ал куралдар менен кылмыш жасоону көздөп жүргөндүгү маалым болгон.
Шектүүнүн өздүгү жана жашаган дареги аныкталып, ал чет элдик жаран экендиги такталган. Анын жашаган жерин тинтүү учурунда, РГД-5 үлгүсүндөгү граната, Калашников автоматынын жана Макаров тапанчасынын октору, уюлдук компаниялардын сим карталары, банк карталары жана шек жараткан китептер табылган.
Чет өлкөлүк 1995-жылы туулган А.А. аттуу жаран кармалып, убактылуу кармоочу жайга киргизилди. Учурда анын башка кылмыштарын аныктоо боюнча тергөө-ыкчам иш-чаралары жүргүзүлүүдө.
