Бүгүн капиталдык оңдоодон өткөн Бишкектеги Эне жана баланы коргоо улуттук борборунун жаңыланган имараты расмий түрдө колдонууга берилди.
Бул тууралуу Президенттин Иш башкаруучусу Каныбек Туманбаев өзүнүн расмий баракчасында маалымдап, борборго барып, жамаат менен жолугуп, оңдоо иштеринин жыйынтыгы менен таанышканын билдирди. Анын айтымында, ар бир палата, коридор, инженердик система жана имараттын кире бериш бөлүгү заманбап стандарттарга ылайык толугу менен жаңыртылды. Учурда бейтаптар жана медицина кызматкерлери үчүн бардык ыңгайлуу шарттар түзүлгөн.
Муну менен катар Каныбек Туманбаев Азербайжан Республикасынын демилгеси менен Бишкек шаарында дагы бир заманбап оорукана куруларын кабарлады. Учурда даярдык иштери жүрүп жатат.
