Бишкекте биринчи муниципалдык көп кабаттуу унаа токтотуучу жайды куруу пландалууда. Аталган унаа токтотуучу жай Жукеев-Пудовкин көчөсү, 138 дарегинде жайгашаары маалым болду. Бул тууралуу мэриядан билдиришти.
Мындан тышкары, жогоруда аталган жер тилкеде футбол аянтчасын, воркаут аянтчасын, гүл бакча жана балдар ойноочу аянтчаны куруу пландалууда.
Белгилей кетсек, аталган участокто №12 гараж кооперативи жайгашкан.
«2022-жылдын 6-октябрындагы жер участокторуна ижара укугун берүү боюнча комиссиянын жыйынында Бишкек шаарынын мэриясынын Муниципалдык мүлктү башкаруу боюнча департаментине жогоруда көрсөтүлгөн дарек боюнча жер участогун убактылуу пайдалануу укугун токтотууну каттоо үчүн «Кадастр» мамлекеттик мекемесинин Бишкек филиалына тиешелүү кат жөнөтүүнү тапшыруу чечими кабыл алынды. Учурда жер тилке департаментке бекитилген. Ошондой эле Бишкек шаарынын мэриясынын Көрктөндүрүү жана жер пайдаланууну көзөмөлдөө боюнча муниципалдык инспекциясына объекттерди демонтаждоо маселесин иштеп чыгуу жана жер участогун баштапкы абалга келтирүү милдеттендирилди»,- деп берилет маалыматта.
