«Достук-автодорожный» өткөрүү пунктунан кыргыз-өзбек мамлекеттик чек арасын мыйзамсыз кесип өтүүгө аракет кылган казакстандын эки жараны кармалды. Бул тууралуу УКМКнын басма сөз кызматы билдирди.
Маалыматка ылайык, алар 23-октябрда кыргыз-казак мамлекеттик чек арасын мыйзамсыз кесип, кызматтык өткөрүү пункттарын айланып өтүп, Кордай-автодорожный постунан алыс эмес жерде өтмөктөр аркылуу өтүшкөн.
Бул факты боюнча Кылмыш-жаза кодексинин 378-беренесинин 1-бөлүгү менен иш козголгон.
Ыкчам иш чаранын натыйжасында ушул жылдын 26-октябрында Казакстандын жарандары Ж.А.Е. жана Б.Д.Д. кармалышкан. 31-октябрда Октябрь райондук соту тарабынан кармалгандарга карата Бишкек шаарынын №1 СИЗОсуна 2 айга камакка алуу түрүндөгү баш коргоо чарасы колдонулган.
Учурда тергөө амалдары жүрүп жатат.
