Ленин РИИБ кызматкерлеринин кызмат абалынан кыянаттык менен пайдаланып, физикалык күч колдонуу фактысы катталды. Бул тууралуу УКМКнын басма сөз кызматы билдирет.

Маалыматка ылайык, милиция кызматкерлери «майда бейбаштык» боюнча шектелген КР жараны Л.Т.Д.ны №2 шаардык милиция бөлүмүнө жеткиришип, өздөрүнүн күчүн жана бийлигин көрсөтүү максатында, эч кандай негизсиз кармалган жаранды сабап салышкан.

Алган жаракаттарына байланыштуу Л.Д.Т. тез жардам бригадасы тарабынан Улуттук госпиталга жеткирилип, стационардык дарылоо дайындалган.
Эксперттик корутундуга ылайык, жабырлануучу: баш мээнин чайкалышы менен коштолгон жабык баш мээ жаракаты, эки омуртканын туурасынан кеткен өсүндүлөрүнүн сынуусу менен коштолгон жүлүндүн жабык жаракаты, ошондой эле бет жана бел тарабынын жумшак ткандарынын көгөрүшү.

2026-жылы 21-февралда милициянын кенже лейтенанты Р.у.М. кармалып, УКМКнын убактылуу кармоочу жайына киргизилди.

Учурда бул ишке тиешеси бар башка кызмат адамдарын аныктоо боюнча кошумча тергөө-ыкчам иш-чаралар жүргүзүлүүдө.