2-ДЕПОнун аймагында Бишкек шаарынын мэри Айбек Джунушалиевге кытайлык Geely Group компаниясынын заманбап электр автобустарынын презентациясы сунушталды.
Көрсөтүлгөн модель — узундугу 8,5 метрден бир аз ашкан, шаар ичинде колдонууга ыңгайлуу чакан электробус. Бул өлчөм ага шаардын көчөлөрүндө оңой жүрүүгө мүмкүндүк берет.
Автобус 100–200 кВт кубаттуулуктагы электр кыймылдаткычы жана 170 кВт/саат көлөмүндөгү батарея менен жабдылган. Бул анын кеминде 250 км жүрүүсүн камсыздайт. Дисктүү тормоз системасы жүргүнчүлөр үчүн коопсуздукту жана ыңгайлуулукту жогорулатат.
Geely 88ден ашык өлкөдө иштейт жана 700дөн ашык тейлөө борборуна ээ.
Сунуштан кийин тиешелүү кызматтарга көрсөтүлгөн транспортту жана кызматташуу мүмкүнчүлүктөрүн кылдат изилдөө тапшырылды. Акыркы чечимдер транспорттун натыйжалуулугун комплекстүү талдоо жана баалоодон кийин кабыл алынат.
