Борбордук шайлоо комиссиясы талапкерлер арасындагы 30%дык гендердик квотанын жобосун өзгөрттү. Бул тууралуу БШКнын мүчөсү Искендер Гаипкулов билдирди.
Анын айтымында, буга чейин партиялык тизме менен шайланып келип, жети мандат алган партиядан эки аял депутаттыкка келген. Бүгүнтөн тартып үч мандат алган партиядан – 1, ал эми жети мандат алган партиядан — 3 аял депутаттыкка келет.
Бул өзгөртүү баштапкы жыйынтык боюнча жети мандат алган «Альянс» партиясына тиешелүү. Тактап айтканда, «Альянс» партиясынан депутаттыкка талапкер Жанар Акаевдин ордуна Токтобүбү Оргалча мандат алат.
Буга чейин БШКда жобону өзгөртүү боюнча эки жолу добуш берилип, эки жолу тең колдоо тапкан эмес. Бул жолу шайлоо комиссиясынын айрым мүчөлөрү өз позициясын өзгөрткөн. Азырынча Жанар Акаев жана «Альянс» партиясы БШКнын акыркы чечими боюнча комментарий бере элек.
