Быйыл Бишкекте Кара-Кеченин көмүрүн сатууга жана жагууга тыюу салынды. Ошондой эле, Бишкекке Казакстандын көмүрүн ташып келүү пландалып жатат. Бул тууралуу энергетика министринин орун басары Талайбек Байгазиев “Азаттыкка” билдирген.
“Бул экологияга көңүл буруу үчүн жасалып жаткан иш. Бишкекте көп жылдан бери эле ыш маселесин көтөрүп келатабыз. Кара-Кеченин көмүрүнө тыюу салсак, ышты бир аз болсо да азайтат деп жатабыз”, — деген ал.
Белгилей кетсек, Кара-Кеченин көмүрү Чүй, Нарын жана Ысык-Көл облустарына сатыла берет. Андан тышкары Бишкек жылуулук электр борборуна (ЖЭБ) Кара-Кеченин 600 миң тонна көмүрү жагылат. Кара-Кеченин көмүрүнүн зыяндуулугу жогору деп эсептелинет.
