Чүйдө кабель уурулук боюнча бир нече фактыларды жасаган шектүү кармалды. Бул тууралуу Чүй ОИИБдин басма сөз кызматы билдирди.
Маалыматка ылайык, ыкчам-иликтөө иш-чараларынын жүрүшүндө Ивановка айылында телефон кабелин уурдаганга шектүү жаран кармалып, РИИБдин тергөө кызматына өткөрүлүп берилди.
Аталган факты Кылмыш-жаза кодексинин 205-беренесинин (Уурдоо) негизинде каттоого алынып, сотко чейинки териштирүүлөр башталган.
Шектүүнүн өздүгү такталып, ал 51 жаштагы М.Д. аттуу жергиликтүү тургун болуп чыккан.
Ал Ысык-Ата районунун аймагында дагы 4 кабель уурулук фактысына тиешеси бар экендиги аныкталган.
Учурда тергөө иштери уланууда.
