1-июлдан 31-июлга чейин миграциялык мыйзамдарды бузган чет өлкөлүк жарандар жана жарандыгы жок адамдар Кыргызстандан айып пул төлөбөстөн өз ыктыяры менен чыгып кете алышат. Бул тууралуу Эмгек, социалдык камсыздоо жана миграция министрлиги билдирди.
Маалыматка ылайык, бул үчүн жарандар Ички иштер министрлигинин аймактык бөлүмүнө кайрылып, тиешелүү чечимди алышы жана андан соң e-Visa порталы аркылуу мамлекеттик алымсыз чыгуу визасын тариздеши керек.
Жеңилдетилген тартип өлкөдө болуу мөөнөтүн бузган, визасы же уруксат берүүчү документтеринин мөөнөтү өтүп кеткен, ошондой эле мыйзамдуу жүргөнүн ырастаган документтери жок адамдарга тиешелүү.
Ошол эле учурда кылмыш иши козголгон, соттун мыйзамдуу күчүнө кирген чечими бар, төлөнбөгөн айып пулу же салыктык карызы бар адамдар бул мүмкүнчүлүктөн пайдалана алышпайт.
Министрлик белгилегендей, бул тартип чет өлкөлүктөрдүн Кыргызстандагы жүрүүсүн мыйзамдаштырбайт, болгону 31-июлга чейин өлкөдөн өз ыктыяры менен чыгып кетүүгө шарт түзөт. Мөөнөттөн кийин мыйзам бузуу менен өлкөдө жүрүүнү уланткандарга мыйзамда каралган чаралар көрүлөт.
